काठमाडौँ । बैतडीको पञ्चेश्वर गाउँपालिका–२ की अन्दाजी १७ वर्षीया एक किशोरी एघार महिनादेखि बेपत्ता छिन्, अभियुक्त प्रहरी हवल्दार कृष्णराज जोशी हिरासतमा छन्, तर जिल्ला प्रहरी कार्यालय बैतडीसँग न किशोरीको अत्तोपत्तोबारे कुनै जानकारी छ, न त जनतालाई दिने जवाफ।
यो संवेदनशील प्रकरणमा प्रहरीको असफलता र लाचारी मात्र होइन, सूचना लुकाउने र जिम्मेवारीबाट भाग्ने निर्लज्ज प्रवृत्ति पनि छताछुल्ल भएको छ। जिल्ला प्रहरी कार्यालयका प्रमुख नायब उपरीक्षक (डीएसपी) मकेन्द्रकुमार मिश्रको सरुवा भइसकेको छ र नयाँ प्रमुख दिपककुमार रायले कार्यभार सम्हाल्न बाँकी छ। यस्तो अवस्थामा संगठनको आधिकारिक सूचना प्रवाह गर्ने र जनताप्रति जवाफदेही हुने सम्पूर्ण जिम्मेवारी सूचना अधिकारीको काँधमा हुन्छ। तर, बैतडीका सूचना अधिकारी, प्रहरी निरीक्षक बलराम पाण्डेले आफ्नो पदीय कर्तव्यलाई तिलाञ्जली दिँदै गैरजिम्मेवारीको पराकाष्ठा देखाएका छन्।
पञ्चेश्वरकी १७ वर्षीया किशोरी बेपत्ता भएको एघारौं महिना पुग्दाको पछिल्लो अवस्थाबारे बुझ्न आज हामीले सूचना अधिकारी पाण्डेलाई सम्पर्क गर्दा उनले प्रश्नबाट भाग्ने हर्कत गरे। दिउँसो १२ बजेर २८ मिनेटमा सम्पर्क गर्दा सुरुमा फोन उठाएका उनले, किशोरी बेपत्ता प्रकरणबारे प्रश्न सोध्नासाथ आफू “एक कार्यक्रममा रहेको“ भन्दै टारे। उनले एक घण्टापछि फोन गर्न भने, तर उनको त्यो ’एक घण्टा’ कहिल्यै आएन। त्यसपछि हामीले पटक–पटक उनको मोबाइल र जिल्ला प्रहरी प्रमुखको सरकारी नम्बरमा फोन ग¥यौं, तर कुनै पनि फोन उठेन।
एक सूचना अधिकारीले फोन नउठाएको सामान्य विषय भने होइन। यो राज्यको एक सुरक्षा अंगले पीडित परिवार र जनताको सूचनाको हकमाथि गरेको ठाडो प्रहार हो। जब रक्षक नै यसरी गैरजिम्मेवार र अनुत्तरदायी बन्छ भने, नागरिकले न्यायको आशा कसबाट गर्ने? सूचना अधिकारी पाण्डेले आफ्नो पदीय कर्तव्यबाट च्यूत भएर केवल आफ्नो होइन, सिंगो प्रहरी संगठनको विश्वसनीयतामाथि कालो धब्बा लगाएका छन्।
के थियौ घटना ? के-के प्रमाण भेटिए ? के भन्छ परिवार ?
२०८१ असोज २५ गते सुक्रबार बिहान करिब ४ बजेको समयमा घरबाट पानी भर्न गएकी किशोरी अबरेसम्म नफर्किएपछि स्थानीयले खोजी गरेका थिए । त्यसपछि दिउँसो करिब १ बजेको समयमा भारतपट्टीबाट भाग्दै गरेको अवस्थामा हवल्दार कृष्णराज जोशीलाई महाकाली नदीपारी भारतपट्टबीबाट नियन्त्रणमा लिएका थिए । ती किशोरी बेपत्ता भएको ११ महिना पुरा भयसक्दा पनिअहिलेसम्म न उनको सास भेटिएको छ न त लास । यो घटनामा संलग्न भनिएका व्यक्ति स्वयं नेपाल प्रहरीका एक वरिष्ठ हवल्दार कृष्णराज जोशी प्रहरी हिरासतको हावा खाइरहेका छन् ।
बेपत्ता भएको एघार महिना बितिसक्दा सम्म किशोरीको अवस्था थाहा नहुदा बेपत्ता परिवारमा चिन्ता छाएको छ । छोरी आज आउँछे कि भनेर सधै बाटो हेरिरहने परिवारले कुरेको ११ महिना बित्यो तर एघार महिनासम्म न किशोरीको फोन आयो, न त कुनै जानकारी । परिवार ११ महिनादेखि हराएकी १७ वर्षीया छोरीको पर्खाइमा दिन रात बिताइरहेको छ ।
परिवार यो घटनाबारे सत्यतथ्यबाहिर आउने कुरामै ढुक्क छैन्, किन कि नेपाल प्रहरीका एक वरिष्ठ हवल्दार नै यही प्रकरणमा ११ महिनादेखि थुनामा छन् । जसले जनताको सुरक्षा गर्नु पर्ने, उसैले न्याय खोजिरहेका नागरिकको भरोसामाथि चोट दिएको बेपत्ता किशोरीका काका प्रेम सिँह मंगोलाको भनाइ छ “प्रहरीमै उजुरी दिएँ, प्रहरी नै पक्राउ परे ! मंगोला भन्छन् ।
उसो त “सुरक्षाकर्मीबाटै सुरक्षा खल्बलिनु भनेको राज्यसंस्था प्रतिको भरोसा डगमगाउनु रहेको अधिकारकर्मीहरुले बताउने गरेका छन । ११ महिना बितिसके, तर किशोरीको अत्तोपत्तो छैन। न्यायका लागि जति दबाब दिइयो, उति नै ढिलाइ गरियो। कहिलेकाहीँ त लाग्छ, कानुन पनि विवश छ कि भन्ने… न्यायको एउटा कुरा अझै बाँकी छ — एक आमाको चोइटिएको मनलाई फेरि जोड्ने आशा तर त्यो आशा, राज्यले पूरा गर्छ गर्दैन हेर्न बाकी रहेको बेपत्ता किशोरीका आफन्त बताउछन् ।
थप पक्राउ देखि सिआईबीसम्म के-के भयो ?
गत वर्ष असोज महिनाको अन्तिम साता बेपत्ता भएकी किशोरीको अहिले सम्म केही अत्तोपत्तो लागेको छैन । तिन महिनासम्म पनि उनको अवस्था पत्ता नलागेपछि नेपाल प्रहरीको केन्द्रीय अनुसन्धान ब्युरो (सिआईबी) ले अनुसन्धान थालेको थियो ।
पञ्चेश्वर गाउँपालिकाकि १७ वर्षीया किशोरी गत वर्षको असोज २५ गते बेपत्ता भएकी थिइन् । सोही दिन उक्त घटनामा संलग्न रहेको भन्दै प्रहरी हवल्दार कृष्णराज जोशी पक्राउ परेका थिए । अहिले आरोपित जोशीलाई पुर्पक्षका लागि कारागार चलान गरिएको छ । जिल्ला अदालत बैतडीले उनलाई गत वर्षको कार्तिक १३ गते कारागार चलान गरिएको थियो । प्रहरी हवल्दार जोशी पञ्चेश्वर–२ कै महाकाली प्रहरी चौकीमा कार्यरत थिए । उनलाई महाकाली नदीपारी भारततर्फबाट स्थानीयले नियन्त्रणमा लिएका थिए । त्यसपछि किशोरी र उनीबीच कुनै न कुनै सम्बन्ध रहेको स्थानीय र आफ्नतले प्रमाण सहित पुष्टि गरेका थिए । प्रहरी अनुसन्धानबाट समेत प्रहरी हवल्दार जोशीको असोज २५ गतेसम्म किशोरीसँग भेट भएको निष्कर्ष निकालिएको थियो ।
अहिले भने उक्त घटना अनुसन्धानमा छ तर किशोरी भने के कहाँ कसरी र कस्तो अवस्थामा छन भन्ने कुरा एकिन भने गर्न सकिएको छैन । पञ्चेश्वर गाउँपालिका–२ की अन्दाजी १७ वर्षीया बेपत्ता किशोरीका तस्बिर आरोपित हवल्दारको मोबाइल फोनमा भेटिए पछि किशोरी बेपत्ता पारेको ४ दिनपछि बेपत्ता किशोरीका आफन्तबाट किशोरी बेपत्ता पारेको आरोप लागेका बरिष्ट प्रहरी हवल्दार कृष्णराराज जोशीको नाममा किटानी जाहेरी परेको थियो । किशोरीलाई हवल्दार जोशीले नै बेपत्ता बनाएको भन्दै बेपत्ता किशोरीका आफन्तले किशोरी बेपत्ता भएको चार दिनपछी किटानी जाहेरी दिएका थिए ।
तेसपछी बेपत्ता किशोरीका आफन्तले दिएको जाहेरीका आधारमा बेपत्ता किशोरीका परिवारले आरोप लगाएका बैतडीको पञ्चेश्वर गाउँपालिका –२ स्थित तत्कालीन महाकाली प्रहरी चौकीमा कार्यरत बरिष्ट प्रहरी हवल्दार कृष्णराराज जोशी रहेका र सोही किटानी जाहेरीको आधारमा कानुनी प्रक्रिया अघि बढाइएको थियो । जिल्ला प्रहरी कार्यालय बैतडीका अनुसार आरोपित हवल्दार अहिले पुर्पक्षका लागि कारागार चलान गरिएको बताइएको छ ।
आफन्तले प्रहरीलाई के-के प्रमाण दिए ? भेटिए आरोपित प्रहरी हवल्दारले किशोरीसँग खिचेका तस्विर!
आरोपित हवल्दार जोशीको नाममा किटानी दिएका किशोरीका आफन्तका अनुसार किशोरी बेपत्ता आरोप लागेका महाकाली प्रहरी चौकीमा कार्यरत बरिष्ट हवल्दार कृष्णराराज जोशीले किशोरीलाई बेला बेला भेट्न बोलाएका तथ्य प्रमाण र तस्बिर संगै निकटतम सम्बन्धमा रहेर बनाएका भिडियो फुटेज समेत आफू संग रहेको दाबी गर्ने गरेका छन् । बेपत्ता किशोरी पक्षबाट किटानी जाहेरी संगै प्रमाणका रूपमा पेस गरेका तस्बिर आरोपित हवल्दारको मोबाइल फोनबाट फेला पारेको बेपत्ता किशोरीका काका प्रेम सिँह मंगोलाले बताएका छन् ।
बरिष्ट प्रहरी हवल्दार नै संलग्न रहेको सिमानाका नजिकको किशोरी बेपत्ता घटना रहस्यमय देखिएको पञ्चेश्वर गाउँ पालिका वडा नम्बर २ का वडा अध्यक्ष वीर बहादुर चन्दले बताए । किशोरी बेपत्ता प्रकरणको उक्त घटना अहिले सिआईबी र जिल्ला प्रहरीको टोलीले सुक्ष्म अनुसन्धान गरिरहेको जिल्ला प्रहरी कार्यालय बैतडीले जनाएको छ । अहिले आरोपित तत्कालीन प्रहरी हवल्दार जोशी कार्यरत प्रहरी चौकी स्थानीयको बिरोध पश्चात् अन्यत्र सारिएको छ । उक्त ठाँउमा प्रहरी चौकी छैन । आरोपित प्रहरी हवल्दार डिम्बर गाउँमै रहेको प्रहरी चौकी महाकालीका निमित्त इन्चार्ज समेत रहेका थिए ।
