मुम्बई । इन्डियन प्रिमियर लिग (आइपिएल) अन्तर्गत बुधबार भएको दोस्रो खेलमा चेन्नई सुपर किङ्ग्सले कोलकाता नाइट राइडर्सलाई २२१ रनको विशाल लक्ष्य दिएको छ ।
टस जितेको कोलकाताले पहिला फिल्डिङ रोजेपछि ब्याटिङका लागि मैदानमा उत्रिएको चेन्नईले प्रारम्भिक ब्याट्सम्यानद्वय ऋतुराज गायकवाड र फाफ डुप्लेसिसको शतकीय साझेदारीको मद्दतमा २२० रनको योगफल तयार पारेको हो । दुवैबीच ११५ रनको साझेदारी भएको थियो ।
गायकवाडले ६४ र डुप्लेसिसले अविजित ९५ रन बनाए । यस्तै मोइन अलीले २५ र कप्तान महेन्द्र सिंह धोनीले १७ रन बनाए ।
कोलकाताका लागि केही किफायती बलिङ गरेका वरुण चक्रवर्तीले चार ओभरमा २७ रन दिएर एक विकेट लिए । त्यस्तै सुनिल नारिनले चार ओभरमा ३४ रन खर्चिएर एक विकेट लिए भने विकेटविहीन रहेका प्रशिद्ध कृष्णाले चार ओभरमा ४९ रन दिए ।
अंक तालिकाको तेस्रो स्थानमा रहेको चेन्नईले अहिलेसम्म आफ्नो तीन खेलमा दुई जित र एक पराजयको नतिजा व्यहोरेको छ भने तीन खेल खेलेको कोलकाता एक जित र दुई पराजयका साथ छैटौं स्थानमा छ ।
