राहत वितरण गर्न पुगेका हेलिकप्टरसँग सहकार्य गरी गाउँपालिकाका कर्मचारीलाई बेँसीशहर ल्याइएको हो । प्रमुख प्रशासकीय अधिकृत, योजना शाखा प्रमुख र लेखा प्रमुखले बेंसीशहरबाट सेवा प्रवाह गरिरहेका छन् । अहिले नासोबाट कुनै पनि आर्थिक कारोबार गर्न सक्ने अवस्था छैन ।

धारापानीमा सडक र घर बगाएपछि प्रहरी नै अहिले स्थानीयवासी विद्यालयमा बस्दै आएका छन् । मानिस सबै ओडार गाउँमा विस्थापित भएका छन् । प्रमुख जिल्ला अधिकारी विष्णु लामिछानेले धारापानीमा अब मानिसको बस्ती बस्न गाह्रो रहेको बताए । लमजुङ प्रशासनको सहयोगमा नासोको आपत्कालीन कार्यालयका लागि सकेसम्म सरकारी कोठा खोज्ने प्रयास भइरहेको उनले जानकारी दिए ।

धारापानीस्थित सो गाउँपालिकाको कार्यालयसँगै रहेको प्रभु बैंक, प्राइम कमर्सियल बैंक, सीमा प्रहरी चौकी, पर्यटकीय होटलसहित स्थानीयवासीका १० घर मर्स्याङ्दी नदीले बगाएको थियो । गाउँपालिकाको योजना अनुगमन, भुक्तानी, नयाँ योजना छनोटलगायत महत्वपूर्ण काम गर्दै आएको कम्प्युटरसहितका सबै कागजपत्र मर्स्याङ्दी नदीको बाढीले लगेको थियो ।

प्रमुख प्रशासकीय अधिकृत रेग्मीसहित १५ कर्मचारीले पाँच दिन ढुङ्गाको पहरामुनि रात बिताएका थिए । गाउँपालिकामा बिजुली, सञ्चार, इन्टरनेट नहुँदा जनप्रतिनिधि, कर्मचारी र स्थानीयवासीबीच नै सम्पर्क विच्छेद भएको थियो ।
“एक ठाउँबाट अर्को ठाउँमा पुग्ने बाटो, पुल सबै बाढीले बगाएको छ, मान्छे हिँड्ने समेत बाटो छैन, अब ठूलो सङ्कट आउन सक्ने स्थिति छ, नागरिक थुनिएका छन्”, उनले भने, “पूर्ण रुपमा विस्थापित भएको ठाउँमा खाद्यान्न पुगेको छैन ।”

कार्यपालिकाको बैठकले प्रत्येक वडालाई १५ बोरा चामल र दुई बोरा नुनको व्यवस्था गरेको छ । पूर्ण रूपमा विस्थापितलाई अलग्गै एक बोरा चामल र खाना पाएका तथा खानका लागि भाँडा दिइएको गाउँपालिका अध्यक्ष घलेले बताए ।

घलेले प्रभावित क्षेत्रमा नै कम राहत पुगेको बताए । “बेंसीशहरबाट यातायात खुलाउन सक्ने अवस्था तत्काल देखिँदैन, सबै वडामा खाद्यान्न उत्पादन पनि हुँदैन”, उनले भने, “बाढीसँगै स्वास्थ्यमा समस्या आउन सक्छ, राज्यले तत्काल सम्बोधन नगरे स्वास्थ्य र भोकमरीको अवस्था सिर्जना हुनसक्ने स्थिति छ ।” मनाङका चार स्थानीय तहमध्ये सबैभन्दा प्रभावित नासो गाउँपालिका हो ।