काठमाडौं । नेपाल विद्युत् प्राधिकरणले यस वर्षको तिहार अन्तर्गत लक्ष्मीपूजाको साँझ विद्युत्को उच्चतम माग १ हजार ७ सय मेगावाट पुग्ने अनुमान गरेको छ। तिहारका अवसरमा घर, कार्यालय तथा सार्वजनिक स्थानहरूमा झिलिमिली बत्ती बाल्ने र विभिन्न विद्युतीय सामग्रीको प्रयोग ह्वात्तै बढ्ने भएकाले साँझको समयमा विद्युत्को माग उच्च हुने गर्दछ। प्राधिकरणले सोही कुरालाई मध्यनजर गर्दै यस वर्ष लक्ष्मीपूजाको दिन विद्युत् खपत बढेर १ हजार ७ सय मेगावाट पुग्ने प्रक्षेपण गरेको हो। गत वर्षहरूको तुलनामा यस वर्ष पनि विद्युत्को मागमा वृद्धि हुने देखिएको छ।
प्राधिकरणका कार्यकारी निर्देशक दीर्घायु कुमार श्रेष्ठका अनुसार लक्ष्मीपूजाको साँझ अनुमान गरिएको उक्त विद्युत्को माग पूरा गर्न आन्तरिक उत्पादन नै पूर्ण रूपमा पर्याप्त हुनेछ। उनले सो समयमा नेपालको कुल विद्युत् उत्पादन करिब २ हजार ५ सय मेगावाट पुग्ने प्रक्षेपण रहेको जानकारी दिएका छन्। माग १ हजार ७ सय मेगावाट र उत्पादन करिब २ हजार ५ सय मेगावाट हुने भएकाले आपूर्ति सहज बनाउन पर्याप्त विद्युत् उपलब्ध हुने प्राधिकरणको भनाइ छ। यसले गर्दा मागभन्दा उत्पादन बढी हुने र विद्युत् आपूर्तिको क्षेत्रमा कुनै ठूलो समस्या नआउने विश्वास लिइएको छ।
अँध्यारोमा उज्यालोको पर्वका रूपमा मनाइने तिहारमा लक्ष्मीपूजाको साँझ विद्युत्को माग पछिल्ला वर्षहरूमा निरन्तर बढ्दै गएको तथ्याङ्कले देखाउँछ। २०७९ सालको लक्ष्मीपूजाको साँझ विद्युत्को उच्चतम माग १ हजार ३ सय ५ मेगावाट रहेकोमा २०८० सालमा बढेर १ हजार ४ सय ३८ मेगावाट पुगेको थियो। यसैगरी, २०८१ सालको लक्ष्मीपूजामा १ हजार ६ सय २ मेगावाट र गत वर्ष अर्थात् २०८२ सालको लक्ष्मीपूजामा विद्युत्को माग बढेर १ हजार ६ सय ५० मेगावाट पुगेको थियो। यस वर्ष प्राधिकरणले गरेको १ हजार ७ सय मेगावाटको प्रक्षेपणलाई हेर्दा चार वर्षको अवधिमा लक्ष्मीपूजाको साँझ विद्युत्को उच्चतम माग करिब ४ सय मेगावाटले बढेको प्रस्ट हुन्छ।
तिहार तथा छठ पर्वको समयमा ग्राहकलाई निर्बाध र नियमित विद्युत् आपूर्ति गराउन प्राधिकरणले उत्पादन, प्रसारण र वितरण प्रणालीलाई पूर्ण रूपमा चुस्त राख्ने तयारी गरेको छ। चाडपर्वको सम्पूर्ण अवधिभर प्राविधिक कर्मचारीहरूलाई चौबीसै घण्टा तयारी अवस्थामा राखिने भएको छ। प्रसारण लाइन तथा वितरण प्रणालीमा अचानक आउन सक्ने जुनसुकै प्राविधिक समस्यालाई तत्काल समाधान गर्नका लागि विशेष टोली खटाइने व्यवस्था मिलाइएको छ।
कार्यकारी निर्देशक श्रेष्ठले विद्युत् आपूर्तिमा कुनै पनि किसिमको अवरोध आउन नदिन मातहतका सम्बन्धित कार्यालय प्रमुखहरूलाई सख्त निर्देशन दिएका छन्। उपभोक्ताबाट ‘नो लाइट’ सेवामा प्राप्त हुने गुनासोहरूलाई ढिलाइ नगरी तत्काल सम्बोधन गर्न र मर्मतसम्भारका लागि आवश्यक पर्ने प्राविधिक टोलीलाई उच्च सतर्कताका साथ तयारी अवस्थामा राख्नसमेत प्राधिकरणले जनाएको छ। विद्युत्को पर्याप्त उपलब्धता र पूर्वतयारीका कारण यस वर्षको तिहारमा ग्राहकहरूले विद्युत् कटौतीको समस्या झेल्नु नपर्ने प्राधिकरणको दाबी छ।
