निर्वाचन आयोगले आज स्थानीय तह निर्वाचनबारे दलहरुसँग छलफल गर्दैछ । शुक्रबार प्रतिनिधिसभाको राष्ट्रिय मान्यता प्राप्त दलहरूका शीर्ष नेताहरूलाई छलफलका लागि बोलाएको छ । आयोगले आज बिहान ११ः३० बजे दलका नेताहरुलाई छलफलका लागि बोलाएको छ । आयोगका प्रवक्ता नारायणप्रसाद भट्टराईले आजका लागि राजनीतिक दलहरुलाई छलफलमा बोलाइएको जानकारी दिए ।
राष्ट्रिय दलको मान्यता प्राप्त दलहरूलाई आज छलफलका लागि आयोगमा आमन्त्रण गरिएको उनले बताए । स्थानीय एवं प्रदेश तहको निर्वाचनका सन्दर्भमा आयोगमा आज ती राजनीतिक दलका प्रतिनिधिहरुसँग आवश्यक परामर्श एवं छलफल हुने भएको हो ।
प्रतिनिधिसभामा प्रतिनिधित्व गर्ने राष्ट्रिय स्वतन्त्र पार्टी (रास्वपा), नेपाली कांग्रेस, नेकपा (एमाले), नेपाली कम्युनिष्ट पार्टी, श्रम संस्कृति पार्टी र राष्ट्रिय प्रजातन्त्र पार्टीले राष्ट्रिय दलको मान्यता प्राप्त गरेका छन् । स्थानीय तहका जनप्रतिनिधिको कार्यकाल आगामी वैशाखमा पूरा हुँदैछ । त्यसैले आयोगले नयाँ निर्वाचनको मिति घोषणा र निर्वाचनको तयारीका सन्दर्भमा गृहकार्य थालेको हो । प्रमुख निर्वाचन आयुक्त मानबहादुर कार्कीले पनि केही समयअघि आउँदा वैशाखमा स्थानीय तहको कार्यकाल सकिने भएकाले त्यसको वरपर रहनेगरी र संवैधानिक व्यवस्थाअनुसार नै निर्वाचन हुने बताएका थिए । निर्वाचनको मिति तथा व्यवस्थापन, आवश्यक पूर्वतयारीका सम्बन्धमा राजनीतिक दलहरूको सुझावका लागि सो छलफल गर्न लागिएको आयोगले जनाएको छ । आयोगले राष्ट्रिय मान्यता प्राप्त राजनीतिक दलहरूसँगको छलफलपछि आयोगमा दर्ता भएका अरु राजनीतिक दलहरुसँग पनि छलफल गर्ने कार्यक्रम तय गरेको छ । स्थानीय तहको निर्वाचन फागुन वा चैतमा गर्ने तयारी छ । निर्वाचनको मिति घोषणा गर्नुअघि आयोगले दलहरुको राय लिन लागेको हो । स्थानीय तहमा निर्वाचित पदाधिकारीको कार्यकाल आगामी वैशाख ५ गते सकिँदै छ। स्थानीय तह निर्वाचन ऐनले पदाधिकारीको कार्यकाल सकिनुभन्दा दुई महिनाअघि निर्वाचन गर्नुपर्ने व्यवस्था गरेको छ भने संविधानको धारा २२५ ले गाउँसभा र नगरसभाको कार्यकाल समाप्त भएको ६ महिनाभित्र अर्को निर्वाचन सम्पन्न गर्नुपर्ने व्यवस्था गरेको छ।प्रमुख निर्वाचन आयुक्त मानबहादुर कार्कीले लामो समयसम्म स्थानीय निकाय खाली राख्नुहुन्न भन्ने पक्षमा आयोग रहेको बताए।
सत्तारुढ दल राष्ट्रिय स्वतन्त्र पार्टीले स्थानीय चुनावकै लागि व्यापक तयारी गरिरहेको छ। उसले आफ्ना सबै नेता, सांसदलाई पालिका खटाएर प्रचारमा लगाएको छ। स्थानीय तह र प्रदेशको निर्वाचन एकैपटक गर्ने विषयमा पनि आयोगमा छलफल भइरहेको छ। राजनीतिक दल, सरकार र आयोगबीच सहमति भए दुवै निर्वाचन एकैपटक गर्न सम्भव रहेको अधिकारीहरू बताउँछन्। यद्यपि, स्थानीय तह र प्रदेश सरकार फरक निकाय भएकाले तिनको निर्वाचनसम्बन्धी कानुनी व्यवस्था पनि अलग छ।आयोगले यसपटकको चुनावदेखि अन्तरजिल्ला र विदेशमा बसेका नेपालीलाई मतदानको अवसर दिन अध्ययन गरिरहेको छ। यसअघिकै निर्वाचनमा विद्युतीय मतदानको माग उठिरहेको थियो । तर सीमित अवधि र विशेष अवस्थाको निर्वाचन भएको भन्दै सुशीला कार्की नेतृत्वको अन्तरिम सरकारले मतपेटिकाबाटै प्रतिनिधिसभा निर्वाचन गराएको थियो ।
आगामी स्थानीय तह निर्वाचनमा फेरि इ–भोटिङको माग उठ्ने निश्चितजस्तै छ । तर अहिलेसम्म आयोगले त्यसको तयारी गरिसकेको छैन ।
स्थानीय तह चुनावबारे आज दलहरुसँग छलफल हुदै, आयोगले ६ दललाई पठायो निम्तो
स्थानीय तह चुनावबारे आज दलहरुसँग छलफल हुदै, आयोगले ६ दललाई पठायो निम्तो
तपाईको प्रतिक्रिया
