बालेनको भ्रमणअघि भारतले दियो ३५० मेगावाट विद्युत् आयातको अनुमति, हिउँदमा लोडसेडिङ नहुने, नेपालको माग धान्ने गरी विजुली उपलब्ध गराउने
प्रधानमन्त्री वालेन्द्र शाह (बालेन)को आगामी आइतबारदेखि हुने राजकीय भ्रमणअघि भारतबाट ३५० मेगावाट विद्युत आयात गर्न अनुमति आएको छ । नेपाल विद्युत प्राधिकरणले यस वर्षको हिउँदयाममा भारतबाट ३५० मेगावाट विद्युत आयात गर्न अनुमति पाएको छ। बालेन शाह यहि साता मंसिर ६ गते भारत भ्रमण जादै छन । त्यो भन्दा अघि नै भारतको विद्युत् मन्त्रालयअन्तर्गतको केन्द्रीय विद्युत प्राधिकरणले भारतीय ऊर्जा विनिमय बजार (आईईएक्स) को डे–अहेड तथा रियल टाइम बजारबाट प्रतिस्पर्धी दरमा दैनिक १७ घण्टासम्म विद्युत् आयात गर्न नेपाल विद्युत प्राधिकरणलाई अनुमति दिएको हो।भारतीय राजदूत सुधाकर दलेलाले मंगलबार उर्जा मन्त्री बिराज भक्त श्रेष्ठलाई ऊर्जा मन्त्रालयमा भेट गरी भारतले नेपाललाई हिउँदयाममा ३५० मेगावाट विजुली उपलब्ध गराउने निर्णय गरेको जानकारी गराएका हुन् । प्रधानमन्त्री वालेन्द्र शाहको आसन्न भारत भ्रमणमा मन्त्री श्रेष्ठ पनि नयाँदिल्ली जाँदै छन् । भ्रमणको पूर्वसन्ध्यामा भारतले नेपालको माग धान्ने गरी विजुली उपलब्ध गराउने अनुमति दिएको हो ।
मन्त्री श्रेष्ठका प्रमुख स्वकीय सचिव सन्जिव महर्जनकाअनुसार राजदूत दलेलाले भोटेकोशी नदीमा आएको बाढीले नेपालको विद्युत पूर्वाधारमा क्षति पुगेकाले हिउँदमा नेपालको विद्युत मागलाई भारतले गम्भीरतापूर्वक लिई आवश्यक विजुली उपलब्ध गराउने निर्णय गरेको जानकारी गराए ।
गत भदौमा भोटेकोशी नदीमा आएको विनाशकारी बाढीले जलविद्युत पूर्वाधार र संरचनामा क्षति पुग्दा ४३१ मेगावाट विजुली प्रणाली बाहिर छ । त्यसपछिको कालीगण्डकी र बुढीगण्डकी बाढीले पनि विद्युत पूर्वाधारमा क्षति पुगेको छ । विपद्पछि विद्युत माग धान्न ऊर्जा मन्त्री श्रेष्ठले छिमेक भारतबाट विजुली ल्याउन पहल थालेका थिए । उनले आफ्नो सचिवालय र मन्त्रालय मातहत निकाय तथा नेपाल विद्युत प्राधिकरणलाई परिचालन गरेका थिए । मन्त्री श्रेष्ठले हिउँदमा विद्युत् आपूर्तिका लागि प्राधिकरणका सञ्चालक समिति सदस्यसहित आफ्नो सचिवालयका सदस्यलाई दुईपटक दिल्ली पठाएका थिए । उक्त सम्वादमा भारतले नेपाललाई कति विजुली दिने भन्ने मोडालिटी टुंगिएको थियो ।
केही दिनअघि नेपाल भ्रमणमा आएका भारतीय विदेश सचिव विक्रम मिश्रीसँग मन्त्रालयमा भएको शिष्टाचार भेटमा पनि मन्त्री श्रेष्ठले विजुलीको सहज आपूर्तिका विषयमा छलफल गरेका थिए । त्यसअघि नेपाल आएका भारतीय ऊर्जा सचिवसँग पनि ऊर्जा मन्त्रालयका अधिकारीले यो विषयमा छलफल गरेका थिए । विदेश सचिव मिश्री भारत फर्किएलगत्तै ३५० मेगावाट विजुली दिने निर्णय भएको हो ।
नेपाल विद्युत् प्राधिकरणका कार्यकारी निर्देशक दीर्घायुकुमार श्रेष्ठले ०८३ मंसिर १ गतेदेखि २०८४ साउन १५ गतेसम्म भारतीय बजारबाट विद्युत् आयात अनुमति प्राप्त भएको बताए ।
कार्यकारी निर्देशक श्रेष्ठले भारतबाट ३५० मेगावाट विद्युत आयात गर्ने अनुमतिसँगै नेपालले पनि थप ५६ मेगावाट विजुली भारत निर्यात गर्ने स्वीकृत पाएको बताए । हिउँदयाममा आन्तरिक विद्युत् उत्पादन घट्ने र माग उच्च रहने भएकाले आपूर्ति व्यवस्थापनका लागि भारतबाट विद्युत् आयात गर्नुपर्ने अवस्था रहँदै आएको छ ।
